فلسفة العلاقات نتعلمها من قصة هدهد سليمان
--------------------------------------------------
قصص القرآن الكريم مش تسليه وسرد وخلاص لما نحب نحكي القصص لازم نعرف ان وراها حكمة نتعلمها ونعلمها لأولادنا .
قصة هدهد سليمان بدايتها (وَتَفَقَّدَ الطَّيْرَ) سؤال عن الهدهد ودا حصل امتى _لما تفقد الطير_ يعني سيدنا سليمان من عادته *كشخص مسؤل *هو تفقد رعيته تفقد من هم في مسؤليته . بيسأل عن كل فرد في مملكته .
---------------
كتير من البيوت حالياً ممكن الأب مايشوفش أولادة لأيام لانه بيرجع البيت وهما نايمين ويخرج وهما نايمين أو في المدرسة .
أو يشوفهم وقت قصير وبيكون تعبان زهقان معندهوش طاقة يسمع حد فيهم وكمان الأم ممكن تعدي أيام الاسبوع كلها وهي ما تعرفش من أخبار أولادها شئ الا انهم أكلوا -عملوا الواجبات- ناموا .
--------------------------
رد فعل سيدنا سليمان كان الغضب الطبيعي ولكن بحكمة قال (لَأُعَذِّبَنَّهُ عَذَابًا شَدِيدًا أَوْ لَأَذْبَحَنَّهُ أَوْ لَيَأْتِيَنِّي بِسُلْطَانٍ مُبِينٍ )
يعني ه يتعاقب إلا لو كان عنده عذر لغيابه .
ولما وصل الهدهد وعرف بغضب سليمان لغيابه عمل ايه ؟
ما ارتعبش وخاف وراح يعتذر .
ما طلبش العفو والسماح خوفا من العقاب .
ولكنه (فَمَكَثَ غَيْرَ بَعِيدٍ) وقال بكل عزة ايه هو سبب غيابه (أَحَطْتُ بِمَا لَمْ تُحِطْ بِهِ)
يعنى جبت لك خبر ما تعرفهوش رغم كونك نبي .
-------------------------------
سبحان الله لو حد اتكلم مع والده او رئيسه في العمل كده بنفس الفاظ الهدهد مع سليمان هيعمل معاه ايه في موقف هو منتظره علشان يعاقبه ؟
------------
لكن الهدهد حاسس بالأمان لأنه يثق في حكمة النبي سليمان والحكيم لا يغضب لنفسه ومكانته بدون النظر الى الهدف الأعظم .
وبدأ بكل ثقة يسرد القصة بدقة واختصار وذكر قلب الموضوع (وَجَدْتُهَا وَقَوْمَهَا يَسْجُدُونَ لِلشَّمْسِ مِنْ دُونِ اللَّهِ)
دي القضية اللي تشغل العظماء مش توافه الأمور .
ورد سليمان عليه رغم انه جاء بخبر يقين زي ما قاله ما كانش رد انفعالي بالموقف أو أصدر قرار سريع بناء على كلامه
وكمان ما كذبهوش وقاله أنت بتقول كده علشان تخلص من العقاب على غيابك .
انما كان رده (سَنَنْظُرُ أَصَدَقْتَ أَمْ كُنْتَ مِنَ الْكَاذِبِينَ)
يعني هنتأكد من كلامك ده علشان بعد التأكد نبدأ نتحرك .
--------------------
للاسف كتير من الناس لما يسمع خبر علطول ينقله أو ينفعل لمجرد سماعه ويتصرف على أساس ما سمع بدون اي تحقيق فيه ولما تسأله عرفت من اين ؟ يقولك سمعت أو قرأت الخبر على الفيسبوك .
طيب وانت رأيك ايه ؟ صدقت ليه ؟ أو رفضت تصدق بردو ليه؟
----------
قصص القرآن وأيات القرآن فيها علم نتعلمة مش حكايات نحفظها ونرددها وبس
دمتم بخير
صباح عبد المنعم
تعليقات
إرسال تعليق